Þagnarskylda og trúnaður

Ein af meginreglum laga um persónuvernd og vinnslu persónuupplýsinga er að þær séu unnar með þeim hætti að viðeigandi öryggi persónuupplýsinganna sé tryggt. Þetta felur m.a. í sér þagnarskyldu og trúnaðarskyldu þeirra sem vinna með persónuupplýsingar.

Einnig eru ákveðnar heimildir samkvæmt lögunum til vinnslu viðkvæmra persónuupplýsinga sérstaklega bundnar skilyrði um þagnarskyldu.

• Í fyrsta lagi má nefna heimild til vinnslu sé hún nauðsynleg til að unnt sé að fyrirbyggja sjúkdóma eða vegna atvinnu­sjúkdóma­lækninga, til að meta vinnufærni starfsmanns, greina sjúkdóma og veita umönnun eða með­ferð á sviði heilbrigðis- eða félagsþjónustu. Tekið er fram í lögunum að umrædd vinnsla skuli framkvæmd af starfsmanni sem bundinn er þagnarskyldu.
• Í öðru lagi má nefna heimild til vinnslu sé hún nauðsynleg vegna skjalavistunar í þágu almannahagsmuna, þ.e. einkum varðveislu skjala á opinberum skjalasöfnum. Hvað þessa vinnslu varðar er í lögunum tekið fram að hún skuli fara fram á grundvelli laga sem kveði meðal annars á um þagnarskyldu.
• Ennfremur kemur fram í lögum að leyfisskyld vinnsla persónuupplýsinga skuli bundin þeim skilyrðum að farið verði með persónuupplýsingarnar af þeirri varúð sem reglur um þagnarskyldu og tilgangur vinnslunnar krefjast.