Fréttir

Í september 2021 birti Persónuvernd frétt á vefsíðu sinni þar sem upplýst var að hjá stofnuninni væru þá í vinnslu 19 frumkvæðisathuganir og 4 úttektir. Í fréttinni sagði að vonir stæðu til þess að flestum málunum yrði lokið fyrir árslok 2021.

Út er komin ársskýrsla Persónuverndar 2021. Í ársskýrslunni má meðal annars finna tölfræðilegar upplýsingar og ýmsan fróðleik um hlutverk og starfsemi Persónuverndar, auk formála forstjóra, þar sem farið er yfir helstu verkefni stofnunarinnar á árinu. 

Nýjar leiðbeiningar fyrir foreldra, ábyrgðaraðila og starfsfólk í skóla- og frístundastarfi sem varða netið, samfélagsmiðla og börn verða kynntar á málþinginu Réttindi barna í stafrænu umhverfi á Grand hótel föstudaginn 29. apríl milli kl. 08:30 og 10:15. Leiðbeiningarnar eru samstarfsverkefni umboðsmanns barna, Persónuverndar og Fjölmiðlanefndar.

Persónuvernd hefur sent dómstólum landsins bréf og tilkynnt að stofnunin hafi fellt niður frumkvæðisathugun sína á framkvæmd dómstólanna við birtingu persónuupplýsinga í dómum á Netinu með vísan til dóms Evrópudómstólsins frá 24. mars 2022 í máli nr. C-245/20. Dómurinn varðar undanþágu frá valdsviði eftirlitsyfirvalda samkvæmt evrópsku persónuverndarreglugerðinni, sem vísar til þess þegar dómstólar fara með dómsvald sitt. Í niðurstöðu dómsins segir að vinnsla persónuupplýsinga framkvæmd af dómstólum í sambandi við upplýsingastefnu þeirra (e. in context of their communication policy) varðandi mál sem þeir hafa til meðferðar falli utan valdsviðs eftirlitsyfirvalda samkvæmt reglugerðinni.

Dóm Evrópudómstólsins má lesa hér.