Tvö bréf vegna vinnslu upplýsinga um fjárhagsmálefni einstaklinga
Persónuvernd hefur sent tvö bréf í samræmi við það sem boðað var í greinargerð með stöðluðum skilmálum í starfsleyfum til fjárhagsupplýsingastofa sem birtir voru 3. maí 2021.
Vakin athygli á mikilvægi úttektar á því hvernig gerð skýrslna um lánshæfi getur verið sem áreiðanlegust.
Persónuvernd hefur sent atvinnuvega- og nýsköpunarráðuneytinu og Seðlabanka Íslands bréf varðandi gerð skýrslna um lánshæfi einstaklinga. Eins og fram kemur í bréfinu telur Persónuvernd það ekki falla undir starfssvið stofnunarinnar að ákveða nákvæmlega hvernig mat á lánshæfi skuli gert og hvert vægi einstakra þátta skuli þar vera. Í tengslum við hlutverk ráðuneytisins á sviði viðskiptalífsins, svo og Seðlabankans vegna rannsókna á sviði fjármálastarfsemi, er athygli þessara aðila hins vegar vakin á mikilvægi þess að gerð sé óháð úttekt á því hvernig gerð skýrslna um lánshæfismat getur verið sem áreiðanlegust og gagnast viðskiptalífinu sem best samhliða því að réttindi einstaklinga séu virt.
Bréfið til atvinnuvega- og nýsköpunarráðuneytisins og Seðlabanka Íslands má lesa hér.
Bréf til Creditinfo Lánstrausts hf. um skilyrði fyrir veitingu fræðslu til hins skráða
Persónuvernd hefur sent Creditinfo Lánstrausti hf. bréf þar sem óskað er eftir upplýsingum um hvort skráðum einstaklingum séu sett einhver skilyrði fyrir því að fá fræðslu um vinnslu persónuupplýsinga um sig. Sé svo er þess jafnframt óskað að fram komi hvaða skilyrði þetta eru og hvernig þau eru talin samrýmast persónuverndarlöggjöf.